വി ഡി സതീശന് ഹൈക്കമാൻഡിൽ കരുത്ത്:പ്രിയങ്ക പിന്തുണച്ചെന്ന് സൂചന
തിരുവനന്തപുരം: കേരളത്തിൽ യു.ഡി.എഫ് അധികാരത്തിലേക്ക് നീങ്ങുന്ന സാഹചര്യത്തിൽ മുഖ്യമന്ത്രി സ്ഥാനത്തെ ചുറ്റിപ്പറ്റിയുള്ള ചർച്ചകൾ കോൺഗ്രസിൽ കൂടുതൽ സജീവമാകുന്നു. ഇതിനിടെ, പ്രതിപക്ഷ നേതാവ് വി.ഡി. സതീശന് പ്രിയങ്ക ഗാന്ധിയുടെ പിന്തുണ ലഭിക്കുന്നതായി ദേശീയ തലത്തിൽ റിപ്പോർട്ടുകൾ പുറത്തുവന്നു.കേരളത്തിലെ രാഷ്ട്രീയ സാഹചര്യങ്ങളും തെരഞ്ഞെടുപ്പ് ഫലങ്ങളും വിലയിരുത്തിയ ശേഷമാണ് പ്രിയങ്ക ഗാന്ധി തന്റെ നിലപാട് ഹൈക്കമാൻഡിനെ അറിയിച്ചതെന്നാണ് സൂചന. വി.ഡി. സതീശന്റെ നേതൃത്വത്തിലുള്ള പ്രചാരണ പ്രവർത്തനങ്ങളും സംഘടനാ ഏകോപനവും യു.ഡി.എഫിന്റെ വിജയത്തിൽ നിർണ്ണായക പങ്കുവഹിച്ചുവെന്നാണ് കോൺഗ്രസ് വൃത്തങ്ങൾ വിലയിരുത്തുന്നത്.അതേസമയം, മുഖ്യമന്ത്രി സ്ഥാനത്തേക്ക് കെ.സി. വേണുഗോപാൽ, രമേശ് ചെന്നിത്തല എന്നിവരുടെയും പേരുകൾ സജീവമായി പരിഗണിക്കപ്പെടുന്നുണ്ട്. എംഎൽഎമാരുടെ അഭിപ്രായങ്ങൾ ശേഖരിച്ച എഐസിസി നിരീക്ഷകർ ഹൈക്കമാൻഡിന് റിപ്പോർട്ട് സമർപ്പിച്ചതോടെ അന്തിമ തീരുമാനം ഡൽഹിയിൽ രൂപപ്പെടും.മുഖ്യമന്ത്രി ആരാകുമെന്ന കാര്യത്തിൽ കോൺഗ്രസ് ഹൈക്കമാൻഡിന്റെ തീരുമാനം നിർണായകമാകുമ്പോൾ, പാർട്ടി അകത്തും പുറത്തും സതീശന് അനുകൂലമായ രാഷ്ട്രീയ ചർച്ചകൾ ശക്തമാകുകയാണ്.
