ഇടുക്കി ഇടുക്കിയിൽ യുവാവ് കുത്തേറ്റു മരിച്ചു; ബന്ധുവായ പ്രതി പിടിയിൽ
ഇടുക്കി: കഞ്ഞിക്കുഴി മൈക്കിൾസിറ്റിയിൽ കുടുംബതർക്കത്തെത്തുടർന്നുണ്ടായ സംഘർഷത്തിൽ യുവാവ് കുത്തേറ്റു മരിച്ചു. മൈക്കിൾസിറ്റി കല്ലുമാലിക്കൽ രാജൻ (26) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് രാജന്റെ അയൽവാസിയും ബന്ധുവുമായ കല്ലുവെലിക്കൽ അനൂപിനെ (22) പോലീസ് കസ്റ്റഡിയിലെടുത്തു.വ്യാഴാഴ്ച രാത്രി 10.30 ഓടെയാണ് നാടിനെ നടുക്കിയ സംഭവം നടന്നത്. രാജനും അനൂപും തമ്മിൽ നേരത്തെ തന്നെ കുടുംബപരമായ ചില തർക്കങ്ങൾ നിലനിന്നിരുന്നതായി പോലീസ് സൂചിപ്പിക്കുന്നു. രാത്രിയിൽ വീണ്ടും തർക്കമുണ്ടാവുകയും അത് കൈയാങ്കളിയിലേക്ക് നീങ്ങുകയുമായിരുന്നു. ഇതിനിടെ അനൂപ് കയ്യിലുണ്ടായിരുന്ന ആയുധം ഉപയോഗിച്ച് രാജനെ കുത്തുകയായിരുന്നു.ഗുരുതരമായി പരിക്കേറ്റ രാജനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കൊലപാതകത്തിന് ശേഷം ഒളിവിൽ പോകാൻ ശ്രമിച്ച അനൂപിനെ കഞ്ഞിക്കുഴി പോലീസ് അതിവേഗം പിന്തുടർന്ന് പിടികൂടുകയായിരുന്നു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി മെഡിക്കൽ കോളേജ് ആശുപത്രിയിലേക്ക് മാറ്റി. സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്.
