സമയോചിതം, കുരുന്നിന് കാവലായി സിനോജിന്റെ കൈകള്
കണ്ണുചിമ്മി തുറക്കുന്ന വേഗതയില് ജീവിതം മാറിമറിയാന് ഒരു നിമിഷം മതി. ഇന്ന് സോഷ്യല് മീഡിയയില് നിങ്ങള് കണ്ട ആ വീഡിയോ ഒരുപക്ഷേ ശ്വാസമടക്കി പിടിച്ചല്ലാതെ കണ്ടുതീര്ക്കാന് കഴിയില്ല. റോഡിന്റെ ഒരു വശത്ത് നിന്നും അമ്മയെ കണ്ട് ഓട്ടോയില് നിന്നും ഇറങ്ങി മറുപുറത്തേക്ക് ഓടിയ ഒരു പിഞ്ചുകുഞ്ഞ്… കണ്മുന്നില് പാഞ്ഞുവരുന്ന കൂറ്റന് ബസ്! അവിടെ വിധി നിശ്ചയിച്ചത് മറ്റൊന്നായിരുന്നുവെങ്കില് ഇന്ന് നമ്മള് കേള്ക്കുന്നത് വലിയൊരു ദുരന്തവാര്ത്തയാകുമായിരുന്നു.
എന്നാല് ആ കുഞ്ഞിന് മുന്നില് ദൈവത്തെപ്പോലെ സിനോജ് എന്ന ഡ്രൈവര് ഉണ്ടായിരുന്നു. തന്റെ മുന്നിലേക്ക് പെട്ടെന്ന് ചാടിയ കുഞ്ഞിനെ കണ്ട നിമിഷം, സിനോജ് എന്ന മനുഷ്യന്റെ മനസ്സാന്നിധ്യവും ഡ്രൈവിംഗ് വൈദഗ്ധ്യവും ഒന്നുമാത്രമാണ് ആ ജീവന് തിരിച്ചുനല്കിയത്. ഒരു നിമിഷം പോലും പാഴാക്കാതെ ബസ് വലതുവശത്തേക്ക് വെട്ടിച്ച് ബ്രേക്ക് ചെയ്ത സിനോജിന്റെ ആ തീരുമാനം അത്ഭുതകരമായിരുന്നു.
‘എനിക്കും ഈ പ്രായത്തിലുള്ള രണ്ട് മക്കളുണ്ട്, ആ കുട്ടി ഓടി വരുന്നത് കണ്ടപ്പോള് എന്റെ മക്കളെയാണ് ഓര്മ്മ വന്നത്…’ എന്ന് പറയുമ്പോള് സിനോജിന്റെ വാക്കുകളില് ഇപ്പോഴും ആ നടുക്കം ബാക്കിയുണ്ട്. ആ സംഭവത്തിന് ശേഷം രണ്ട് ദിവസം വണ്ടിയോടിക്കാന് പോലും കഴിയാത്ത വിധം മാനസികമായി തളര്ന്നുപോയ ഈ മനുഷ്യനാണ് ഇന്ന് സോഷ്യല് മീഡിയയിലെ താരം.
റോഡരികില് നില്ക്കുമ്പോഴും മക്കളുമായി യാത്ര ചെയ്യുമ്പോഴും മാതാപിതാക്കള് പുലര്ത്തേണ്ട ജാഗ്രത എത്രത്തോളമാണെന്ന് ഈ വീഡിയോ നമ്മെ ഓര്മ്മിപ്പിക്കുന്നു. സ്വന്തം ജീവന് പോലും പണയപ്പെടുത്തി ആ കുരുന്നിനെ രക്ഷിച്ച സിനോജിന് നമുക്ക് നല്കാം ഒരു വലിയ സല്യൂട്ട്!
മരണത്തിന്റെ പാതയില് നിന്ന് ആ കുഞ്ഞിനെ ജീവിതത്തിലേക്ക് തിരിച്ചുകൊണ്ടുവന്ന സിനോജ്, നിങ്ങള് ശരിക്കും ഒരു ഹീറോയാണ്!
