പുത്തന് പ്രതീക്ഷകളുമായി ലോകം 2026 ല് , പുതുയുഗത്തെ ആവേശത്തോടെ വരവേറ്റ് ലോകം, ആവേശലഹരിയില് ആഘോഷപെരുമഴ തീര്ത്ത്
കൊച്ചി : ആഘോഷങ്ങളുടെ കാതടപ്പിക്കുന്ന ശബ്ദഘോഷങ്ങളോടെയും, കണ്ണഞ്ചിപ്പിക്കുന്ന കരിമരുന്ന് കലാപ്രകടനങ്ങളൊടെയും ലോകം 2026-ലേക്ക്. സംഭവബഹുലമായ 2025-നോട് വിടപറഞ്ഞ്, പുത്തന് പ്രതീക്ഷകളുമായാണ് ജനം പുതുവര്ഷത്തെ വരവേല്ക്കുന്നത്. നഗര-ഗ്രാമ വ്യത്യാസമില്ലാതെ എല്ലായിടത്തും പുതുവത്സര ലഹരി പടര്ന്നുകഴിഞ്ഞു.ആഗോളതലത്തില് പസഫിക് സമുദ്രത്തിലെ കിരിബാസ് ദ്വീപിലാണ് 2026 ആദ്യം പിറന്നത്. തൊട്ടുപിന്നാലെ ന്യൂസീലന്ഡും സിഡ്നിയും പുതുവര്ഷാഘോഷത്തിന്റെ പ്രകമ്പനത്തില് ആറാടി. വമ്പന് കരിമരുന്ന് പ്രയോഗങ്ങളോടെയാണ് ഈ നഗരങ്ങള് ജനുവരി ഒന്നിനെ എതിരേറ്റത്. ദക്ഷിണ കൊറിയയുള്പ്പെടെയുള്ള കിഴക്കന് ഏഷ്യന് രാജ്യങ്ങളും പുതുവര്ഷ ലഹരിയിലേക്ക് കടന്നു. കേരളത്തില് പുതുവത്സരാഘോഷങ്ങളുടെ പ്രധാന കേന്ദ്രമായ ഫോര്ട്ട് കൊച്ചി ജനസാഗരമായി മാറി. പതിവിലും വിപരീതമായി രണ്ട് പപ്പാഞ്ഞിമാരാണ് ഇത്തവണ കൊച്ചിയില് പുതുവര്ഷത്തെ വരവേല്ക്കാന് ഒരുങ്ങിയത് എന്നത് ഈ വര്ഷത്തെ പ്രത്യേകതയായി. പപ്പാഞ്ഞിയെ കത്തിക്കുന്ന ചടങ്ങോടെ കൊച്ചി ആവേശത്തിന്റെ കൊടുമുടിയിലായി. കോവളത്ത് വിദേശ വിനോദസഞ്ചാരികളടക്കം വന് ജനക്കൂട്ടമാണ് കോവളം കടല്ത്തീരത്ത് ആഘോഷങ്ങള്ക്കായി ഒത്തുചേര്ന്നത്. കോഴിക്കോട് ബീച്ചും പരിസരപ്രദേശങ്ങളും വൈകുന്നേരം മുതല്ക്കേ ‘ന്യൂ ഇയര് വൈബില്’ ആയിരുന്നു.കേരളത്തിന് പുറത്ത് ഡല്ഹി, മുംബൈ, ബംഗളൂരു തുടങ്ങിയ മെട്രോ നഗരങ്ങളും ആഘോഷങ്ങളുടെ കാര്യത്തില് ഒട്ടും പിന്നിലായിരുന്നില്ല. കനത്ത സുരക്ഷാ ക്രമീകരണങ്ങള്ക്കിടയിലും ആയിരങ്ങളാണ് പുതുവര്ഷത്തെ വരവേല്ക്കാന് നഗരവീഥികളില് ഇറങ്ങിയത്. മ്യൂസിക് കണ്സര്ട്ടുകളും ഡി.ജെ പാര്ട്ടികളും ആഘോഷങ്ങള്ക്ക് മിഴിവേകി. പഴയ വര്ഷത്തെ കയ്പ്പും മധുരവും നിറഞ്ഞ ഓര്മ്മകള്ക്കപ്പുറം, കൂടുതല് നല്ലൊരു നാളെ എന്ന പ്രതീക്ഷയുമായാണ് ലോകം 2026-ലേക്ക് കാല്വെക്കുന്നത്.
