കോൺഫിഡന്റ് ഗ്രൂപ്പ് ചെയർമാൻ സി.ജെ. റോയ് ആത്മഹത്യ ചെയ്തു

ബെംഗളൂരു: പ്രമുഖ റിയൽ എസ്റ്റേറ്റ് സ്ഥാപനമായ കോൺഫിഡന്റ് ഗ്രൂപ്പിന്റെ ചെയർമാൻ സി.ജെ. റോയ് സ്വയം വെടിവെച്ച് ആത്മഹത്യ ചെയ്തതായി റിപ്പോർട്ട്. ബെംഗളൂരുവിലെ അശോക് നഗറിലുള്ള ഓഫീസിൽ വെച്ചാണ് സംഭവം നടന്നതെന്നാണ് പ്രാഥമിക വിവരം. ഞെട്ടിക്കുന്ന സംഭവത്തെ തുടർന്ന് പ്രദേശത്ത് വലിയ പൊലീസ് സന്നാഹം വിന്യസിച്ചിട്ടുണ്ട്.സംഭവം നടന്ന ഉടൻ അശോക് നഗർ പോലീസ് സ്ഥലത്തെത്തി പരിശോധന ആരംഭിക്കുകയും നടപടികൾ സ്വീകരിക്കുകയും ചെയ്തു. മൃതദേഹം പോസ്റ്റുമോർട്ടത്തിനായി മാറ്റിയിട്ടുണ്ട്. ആത്മഹത്യയിലേക്ക് നയിച്ച കാരണങ്ങൾ സംബന്ധിച്ച് പോലീസ് വിശദമായ അന്വേഷണം ആരംഭിച്ചിട്ടുണ്ട്.അതേസമയം, എൻഫോഴ്‌സ്‌മെന്റ് ഡയറക്ടറേറ്റ് (ED) സി.ജെ. റോയിയുടെ സ്ഥാപനങ്ങളിൽ പരിശോധന നടത്തുന്നതിനിടെയാണ് സംഭവം നടന്നതെന്ന വിവരം പുറത്ത് വന്നിട്ടുണ്ട്. സാമ്പത്തിക ഇടപാടുകളുമായി ബന്ധപ്പെട്ട അന്വേഷണത്തിന്റെ പശ്ചാത്തലത്തിലാണ് ED റെയ്ഡ് പുരോഗമിച്ചിരുന്നതെന്നാണ് സൂചന.ഓഫീസിനുള്ളിൽ നിന്ന് വെടിയേറ്റ ശബ്ദം കേട്ടതോടെ ജീവനക്കാരും സുരക്ഷാ ജീവനക്കാരും ഓടിക്കൂടിയെങ്കിലും, അതിന് മുൻപേ തന്നെ റോയ് മരിച്ച നിലയിലായിരുന്നുവെന്നാണ് വിവരം. സംഭവസ്ഥലത്ത് നിന്ന് ആയുധം കണ്ടെടുത്തതായി പോലീസ് സ്ഥിരീകരിച്ചിട്ടുണ്ട്.ഈ സംഭവവുമായി ബന്ധപ്പെട്ട് ആത്മഹത്യ കുറിപ്പ് കണ്ടെത്തിയിട്ടുണ്ടോ എന്നതടക്കമുള്ള കാര്യങ്ങൾ പോലീസ് പരിശോധിച്ചുവരികയാണ്. കുടുംബാംഗങ്ങളുടെയും അടുത്ത ബന്ധുക്കളുടെയും മൊഴികളും രേഖപ്പെടുത്തും.പ്രമുഖ ബിസിനസ് രംഗത്തെ വ്യക്തിയുടെ അപ്രതീക്ഷിത മരണവാർത്ത സംസ്ഥാനത്തുടനീളം ഞെട്ടലുണ്ടാക്കിയിരിക്കുകയാണ്. സംഭവത്തിൽ കൂടുതൽ വിവരങ്ങൾ പുറത്തുവരുന്നതനുസരിച്ച് പോലീസ് ഔദ്യോഗിക വിശദീകരണം നൽകുമെന്നാണ് അറിയിച്ചിരിക്കുന്നത്.