കിളിമാനൂർ വാഹനാപകടം: ദമ്പതികൾ മരിച്ച സംഭവം : മുഖ്യപ്രതി പിടിയിൽ
തിരുവനന്തപുരം: കിളിമാനൂരിൽ ദമ്പതികളുടെ മരണത്തിന് കാരണമായ വാഹനാപകടത്തിലെ മുഖ്യപ്രതി വള്ളക്കടവ് സ്വദേശി വിഷ്ണുവിനെ പൊലീസ് പിടികൂടി. നെയ്യാറ്റിൻകരയിൽ വെച്ച് ആറ്റിങ്ങൽ ഡിവൈഎസ്പി സ്ക്വാഡാണ് പ്രതിയെ കസ്റ്റഡിയിലെടുത്തത്. കഴിഞ്ഞ ദിവസം വിഷ്ണുവിൻ്റെ ജാമ്യാപേക്ഷ കോടതി തള്ളിയിരുന്നു. ഇതിന് പിന്നാലെയാണ് ഒളിവിൽ കഴിഞ്ഞിരുന്ന പ്രതിയെ പൊലീസ് വലയിലാക്കിയത്.സംഭവത്തെക്കുറിച്ച്:കഴിഞ്ഞ ജനുവരി 3-ന് വൈകുന്നേരം സംസ്ഥാന പാതയിലെ പാപ്പാലയിലായിരുന്നു നാടിനെ നടുക്കിയ അപകടം നടന്നത്. കടയ്ക്കൽ കുമ്മിൾ സ്വദേശികളായ രജിത്തും അംബികയും സഞ്ചരിച്ചിരുന്ന സ്കൂട്ടറിന് പിന്നിൽ വിഷ്ണു ഓടിച്ചിരുന്ന താർ ജീപ്പ് അമിതവേഗതയിലെത്തി ഇടിച്ചുതെറിപ്പിക്കുകയായിരുന്നു.ഗുരുതരമായി പരിക്കേറ്റ അംബിക ഏഴാം തീയതി മരണത്തിന് കീഴടങ്ങി.ചികിത്സയിലായിരുന്ന രജിത്ത് കഴിഞ്ഞ ദിവസം കടയ്ക്കൽ താലൂക്ക് ആശുപത്രിയിൽ വെച്ചും അന്തരിച്ചു.പൊലീസ് വീഴ്ചയും ജനകീയ പ്രതിഷേധവും:അപകടത്തിന് പിന്നാലെ നിർത്താതെ പോയ ജീപ്പ് നാട്ടുകാർ തടഞ്ഞുനിർത്തി ഡ്രൈവർ വിഷ്ണുവിനെ പൊലീസിന് കൈമാറിയിരുന്നു. എന്നാൽ പൊലീസ് ഇയാളെ സ്റ്റേഷൻ ജാമ്യത്തിൽ വിട്ടയച്ചത് വലിയ പ്രതിഷേധത്തിന് കാരണമായി. അംബിക മരിച്ചതിന് ശേഷമാണ് പ്രതിക്കെതിരെ ജാമ്യമില്ലാ വകുപ്പുകൾ ചുമത്തിയത്. എന്നാൽ അപ്പോഴേക്കും വിഷ്ണു ഒളിവിൽ പോയിരുന്നു.പ്രതിയെ പിടികൂടാൻ വൈകുന്നതിൽ പ്രതിഷേധിച്ച് മരിച്ച ദമ്പതികളുടെ മക്കളെയുമായി നാട്ടുകാർ കിളിമാനൂർ സ്റ്റേഷന് മുന്നിൽ കഴിഞ്ഞ ദിവസം ഉപരോധം നടത്തിയിരുന്നു. അപകടസമയത്ത് വാഹനത്തിൽ മറ്റ് രണ്ട് പേർ കൂടി ഉണ്ടായിരുന്നതായും ആരോപണമുണ്ട്. ഇവരെക്കുറിച്ചുള്ള അന്വേഷണവും പൊലീസ് ഊർജിതമാക്കിയിട്ടുണ്ട്.