മലയാറ്റൂര് ചിത്രപ്രിയ കൊലപാതകത്തില് പൊലീസിന്റെ കാഴ്ചപ്പാടുകള് ശരിയല്ല എന്ന അഭിപ്രായവുമായി പെണ്കുട്ടിയുടെ ബന്ധു
എറണാകുളം :മലയാറ്റൂര് ചിത്രപ്രിയ കൊലപാതകത്തില് പൊലീസിന്റെ കാഴ്ചപ്പാടുകള് ശരിയല്ല എന്ന അഭിപ്രായവുമായി പെണ്കുട്ടിയുടെ ബന്ധു. പൊലീസ് കണ്ടെത്തലുകളില് സംശയമുന്നയിച്ച് കൊല്ലപ്പെട്ട ചിത്രപ്രിയയുടെ ബന്ധു ഇന്സ്റ്റഗ്രാം പോസ്റ്റിട്ടു. പൊലീസ് പുറത്തുവിട്ട സിസിടിവി ദൃശ്യങ്ങളില് ഉള്ളത് ചിത്രപ്രിയ അല്ല എന്നാണ് ബന്ധു ശരത് ലാല് പറയുന്നത്. കൊലപാതകവുമായി ബന്ധപ്പെട്ട് നിരവധി തെറ്റായ കാര്യങ്ങള് പ്രചരിക്കുന്നു. പൊലീസ് പറഞ്ഞ പല കാര്യങ്ങളിലും കളവുണ്ടെന്നും ശരത് ലാല് പറയുന്നു. അതേസമയം, പ്രതി അലനെ വീണ്ടും കസ്റ്റഡിയിലെടുത്ത് ചോദ്യം ചെയ്യാന് പൊലീസ് നടപടി തുടങ്ങിയിട്ടുണ്ട്.മലയാറ്റൂരിലെ 19 വയസുകാരി ചിത്രപ്രിയയെ ആണ് സുഹൃത്ത് അലന് തലക്കടിച്ച് കൊന്നത് കൃത്യമായ ആസൂത്രണത്തോടെയെന്നാണ് പൊലീസ് പറയുന്നത്. കൊലയ്ക്ക് മുന്പ് ഇരുവര്ക്കുമിടയില് രൂക്ഷമായ തര്ക്കമുണ്ടായി. നേരത്തെ മുതലേ ശല്യം ചെയ്ത അലനെ പെണ്കുട്ടി അകറ്റി നിര്ത്തിയിരുന്നതായി ബന്ധുക്കള് പറഞ്ഞുസ്കൂള് പഠന കാലത്തെ ചിത്രപ്രിയയെ അലന് അറിയാമായിരുന്നു. അടുക്കാന് ശ്രമിച്ചപ്പോഴൊക്കെ അലനെ പെണ്കുട്ടി അകറ്റി നിര്ത്തി. മികച്ച വോളിബോള് കളിക്കാരിയായ ചിത്രപ്രിയ പിന്നീട് കോലഞ്ചേരിയിലെ സ്കൂളിലേക്ക് മാറി. അപ്പോഴും അലന് പിന്തുടര്ന്നു. ഒടുവില് ബെംഗളൂരുവില് പഠനത്തിന് ചേര്ന്നപ്പോഴും അലന് ഫോണ് വിളി തുടര്ന്നു. ബ്ലേഡ് കൊണ്ട് കൈയില് ചിത്രപ്രിയയുടെ പേര് വരഞ്ഞിട്ടു. ശല്യം സഹിക്ക വയ്യാതെ ചിത്രപ്രിയ താക്കീത് ചെയ്തതോടെ അലന് പ്രകോപിതനായെന്ന് പൊലീസ് പറയുന്നു.നാട്ടിലെത്തിയെ പെണ്കുട്ടിയെ എല്ലാം പറഞ്ഞു തീര്ക്കാനെന്ന് തെറ്റിദ്ധരിപ്പിച്ചാണ് ശനിയാഴ്ച ബൈക്കില് കയറ്റി കൊണ്ടുപോയത്. വീട്ടുകാര് എതിര്ക്കുമെന്നതിനാല് ആരോടും പറയാതെ ചിത്രപ്രിയ അലനൊപ്പം പോവുകയായികുന്നു. നക്ഷത്ര തടാകത്തിനടുത്ത് ഇരുവരും തര്ക്കിക്കുന്നതായി ചിലര് കണ്ടെന്നും പൊലീസ് സൂചന നല്കി. അവിടെ നിന്നാണ് കൊല നടന്ന സെബിയൂര് കൂരപ്പിള്ളി കയറ്റത്തിലേക്ക് പെണ്കുട്ടിയെ കൊണ്ടുപോയത്. പെണ്കുട്ടിക്ക് ലഹരി നല്കിയായിരുന്നോ കൊലപാതകമെന്ന് ബന്ധുക്കള് സംശയിക്കുന്നു. ഒറ്റപ്പെട്ട സ്ഥലമായതിനാല് ചിത്രപ്രിയ നിലവിളിച്ചിട്ടും ആരും കേട്ടില്ല എന്നുമാണ് കരുതുന്നത്.
റിപ്പോർട്ട് മധു
