സൂര്യയുടെ ‘കറുപ്പ്’ കാത്ത് കാത്ത് കണ്ണ് കടഞ്ഞു
ആരാധകര് ആവേശത്തോടെ കാത്തിരിക്കുന്ന സൂര്യയുടെ പുതിയ ചിത്രം ‘കറുപ്പി’നെക്കുറിച്ചുള്ള പുത്തന് വാര്ത്തകള് പുറത്ത്. ആര്.ജെ ബാലാജി സംവിധാനം ചെയ്യുന്ന ഈ മാസ് കൊമേഴ്സ്യല് എന്റര്ടൈനറുടെ ഒടിടി, സാറ്റലൈറ്റ് അവകാശങ്ങള് വന് തുകയ്ക്ക് വിറ്റുപോയെന്നാണ് ട്രേഡ് അനലിസ്റ്റുകള് നല്കുന്ന സൂചന. ചിത്രത്തിന്റെ ഡിജിറ്റല് സ്ട്രീമിംഗ് അവകാശം പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സ് (Netflix) സ്വന്തമാക്കിയപ്പോള്, സാറ്റലൈറ്റ് അവകാശം സീ തമിഴിനാണ് ലഭിച്ചിരിക്കുന്നത്. വിഷു-മെയ് ദിന റിലീസുകളെ ലക്ഷ്യം വെച്ചെത്തുന്ന ചിത്രം ഏപ്രില് 10-നോ മെയ് ഒന്നിനോ തിയേറ്ററുകളിലെത്തുമെന്നാണ് അനൗദ്യോഗിക റിപ്പോര്ട്ടുകള്.രണ്ട് പതിറ്റാണ്ടുകള്ക്ക് ശേഷം സൂര്യയും തൃഷ കൃഷ്ണനും വീണ്ടും ഒന്നിക്കുന്നതും ഈ ചിത്രത്തിന്റെ പ്രത്യേകതയാണ്. സൂര്യയെയും തൃഷയെയും അവരുടെ മുന് സംരംഭങ്ങളില് നിന്ന് വ്യത്യസ്തമായ ഒരു മേക്കോവറില് കറുപ്പ് അവതരിപ്പിക്കും. ഇന്ദ്രന്സ്, നാട്ടി, സ്വാസിക, അനഘ മായ രവി, ശിവദ, സുപ്രീത് റെഡ്ഡി തുടങ്ങി മികച്ച താര നിരയാണ് കറുപ്പിലുള്ളത്.നിരവധി ഹിറ്റുകള്ക്ക് പിന്നിലെ യുവ സംഗീത സെന്സേഷനായ സായ് അഭ്യാങ്കറാണ് കറുപ്പിനായി സംഗീതം ഒരുക്കുന്നത്. നിരവധി ഗംഭീര ചിത്രങ്ങള്ക്ക് പിന്നിലെ ലെന്സ്മാന് ജി കെ വിഷ്ണു ദൃശ്യങ്ങള് കൈകാര്യം ചെയ്യുന്നു. കലൈവാനന് ആണ് കറുപ്പിന്റെ എഡിറ്റിംഗ് നിര്വഹിക്കുന്നത്. അത്ഭുതകരമായ ആക്ഷന് കൊറിയോഗ്രാഫിയിലൂടെ രാജ്യത്തെ മുഴുവന് വിസ്മയിപ്പിച്ച മൂന്ന് സ്റ്റണ്ട് കോര്ഡിനേറ്റര്മാരായ അന്ബറിവ്, വിക്രം മോര് ജോഡികളാണ് കറുപ്പിലെ ഉയര്ന്ന നിലവാരമുള്ള ആക്ഷന് സീക്വന്സുകള് നിര്വഹിച്ചിരിക്കുന്നത്. അവാര്ഡ് ജേതാവായ പ്രൊഡക്ഷന് ഡിസൈനര് അരുണ് വെഞ്ഞാറമൂടാണ് ഈ വലിയ ചിത്രത്തിനായി ഗംഭീരമായ സെറ്റുകള് രൂപകല്പ്പന ചെയ്തത്.
