ഭക്ഷ്യവിഷബാധ രണ്ടുപേർ മരിച്ചു

വിഴിഞ്ഞത്ത് ഹോട്ടലിൽനിന്ന് ഭക്ഷണം കഴിച്ച ഒരു കുടുംബത്തിലെ രണ്ടുപേർ മരിച്ചു. ചടയമംഗലം നിലമേൽ സ്വദേശി ഷാജി (42), അദ്ദേഹത്തിന്റെ ഭാര്യാമാതാവ് റാഷിദ ബീവി (58) എന്നിവരാണ് മരിച്ചത്. ഷാജിയുടെ ഭാര്യ സജിമോൾ (39) ഗുരുതരാവസ്ഥയിൽ പാരിപ്പള്ളി മെഡിക്കൽ കോളേജ് ആശുപത്രിയിൽ ചികിത്സയിലാണ്. വിഴിഞ്ഞം മുഹിയുദ്ദീൻ പള്ളിക്ക് സമീപം പ്രവർത്തിക്കുന്ന ‘അസ്മാക്ക്’ ഹോട്ടലിൽനിന്നാണ് ഇവർ ഭക്ഷണം കഴിച്ചത്. മീൻ വിഭവങ്ങളാണ് ഇവർ കഴിച്ചതെന്നാണ് പ്രാഥമിക വിവരം. വിനോദയാത്രയുടെ ഭാഗമായി വിഴിഞ്ഞത്ത് എത്തിയ കുടുംബം ഹോട്ടലിൽനിന്ന് ഭക്ഷണം കഴിച്ച് ഇറങ്ങിയ ഉടൻ തന്നെ ഷാജിക്കും കുടുംബത്തിനും കടുത്ത ഛർദ്ദിയും ദേഹാസ്വാസ്ഥ്യവും അനുഭവപ്പെടുകയായിരുന്നു.