വാഗമണ്ണിൽ ബോംബുസ്ഫോടനം:ആളുകൾ പരിഭ്രാന്തിയിൽ :രാവിലെ അഞ്ചരയ്ക്കും ആറിനും ഇടയിൽ വാഗമൺ ഫാക്ടറി പ്രദേശത്താണ് സ്ഫോടനമുണ്ടായത്

വാഗമൺ: വെള്ളിയാഴ്‌ച പുലർച്ചെ സിനിമയുടെ ചിത്രീകരണത്തിനിടെ നടന്ന കൃത്രിമ ബോംബുസ്ഫോടനം വാഗമണ്ണിനെ പരിഭ്രാന്തിയിലാക്കി. രാവിലെ അഞ്ചരയ്ക്കും ആറിനും ഇടയിൽ വാഗമൺ ഫാക്ടറി പ്രദേശത്താണ് സ്ഫോടനമുണ്ടായത്. സെറ്റിലെ കെട്ടിടത്തിന്റെ മാതൃക വലിയ ശബ്ദത്തോടെ പൊട്ടിത്തെറിക്കുകയായിരുന്നു.പ്രതീക്ഷിക്കാത്ത സമയത്തുണ്ടായ വൻശബ്ദം കേട്ട് പലരും ഭൂമികുലുക്കമെന്ന് കരുതി വീടുകളിൽനിന്ന് പുറത്തേക്കോടി. ചിലർ ചെരിപ്പുപോലും മറന്നു.പിന്നീടുമാത്രമാണ്, ഇത് സുരേഷ് ഗോപി പ്രധാന കഥാപാത്രമായി അഭിനയിക്കുന്ന സിനിമയുടെ ഭാഗമായ കൃത്രിമ പൊട്ടിത്തെറിയാണെന്ന് മനസ്സിലാക്കിയത്. പരിഭ്രാന്തരായ നാട്ടുകാരിൽ ചിലർ പ്രതിഷേധമറിയിച്ചപ്പോൾ “തമാശയായി കാണൂ” എന്നായിരുന്നു അണിയറപ്രവർത്തകരുടെ മറുപടി. “ഭൂമികുലുക്കം തമാശയല്ലല്ലോ മച്ചാനേ!” എന്നായിരുന്നു നാട്ടുകാരുടെ പ്രതികരണം.അതിനിടെ, തങ്ങളുടെ അനുമതിയില്ലാതെയാണ് പൊട്ടിത്തെറിരംഗം ചിത്രീകരിച്ചതെന്ന് പോലീസ് പറഞ്ഞു. ഇത് ചിത്രീകരിച്ചശേഷം ഉടൻ ഇവർ സ്ഥലംവിടുകയുംചെയ്‌തു. കുറച്ചു നാളുകളായി വാഗമണ്ണിലും പരിസരത്തും ഈ സിനിമയുടെ ചിത്രീകരണം നടക്കുന്നുണ്ട്.