തിരുരിൽ കടിച്ച പാമ്പിനെ കുപ്പിയിലാക്കി യുവാവ് ആശുപത്രിയിൽ

​മലപ്പുറം: തന്നെ കടിച്ച പാമ്പ് ഏതാണെന്ന് തിരിച്ചറിയാൻ പാമ്പിനെ കുപ്പിയിലാക്കി യുവാവ് ആശുപത്രിയിലെത്തി. മലപ്പുറം തിരൂർ ആനപ്പടി സ്വദേശി നാസിമിനാണ് (24) പാമ്പുകടിയേറ്റത്. ചൊവ്വാഴ്ച രാത്രി സുഹൃത്തിന്റെ വീട്ടിലേക്ക് പോകുന്നതിനിടെയായിരുന്നു സംഭവം.​ഇരുട്ടിൽ പാമ്പിനെ അബദ്ധത്തിൽ ചവിട്ടിയ നാസിമിനെ പാമ്പ് കാലിൽ കടിക്കുകയായിരുന്നു. തുടർന്ന് സുഹൃത്തിന്റെ സഹായത്തോടെ പാമ്പിനെ പിടികൂടി പ്ലാസ്റ്റിക് കുപ്പിയിലാക്കി തിരൂർ ജില്ലാ ആശുപത്രിയിൽ ചികിത്സ തേടിയെത്തുകയായിരുന്നു. പാമ്പുമായി യുവാവ് എത്തിയത് ആശുപത്രിയിലുണ്ടായിരുന്നവർക്കിടയിൽ അല്പം പരിഭ്രാന്തിയുണ്ടാക്കി.​തുടർന്ന് ആശുപത്രി അധികൃതർ പാമ്പിന്റെ ചിത്രം വനംവകുപ്പിന്റെ ‘സർപ്പ’ വളന്റിയർമാർക്ക് അയച്ചുകൊടുക്കുകയും, കടിയേറ്റത് വിഷമില്ലാത്ത ‘നീർക്കോലി’ വിഭാഗത്തിൽപ്പെട്ട പാമ്പാണെന്ന് സ്ഥിരീകരിക്കുകയും ചെയ്തു. നാസിമിന് ആവശ്യമായ പ്രാഥമിക ചികിത്സകൾ നൽകി. വിഷബാധയേറ്റിട്ടില്ലെന്ന് ഉറപ്പായതോടെ നാസിമിന്റെ ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ഏത് പാമ്പാണെന്ന് തിരിച്ചറിയുന്നത് ചികിത്സ എളുപ്പമാക്കുമെന്നതിനാലാണ് പാമ്പിനെ കൂടെക്കൊണ്ടുവന്നതെന്ന് നാസിം പറഞ്ഞു.