മാള അഷ്ടമിച്ചിറയിൽ ബൈക്ക് അപകടത്തിൽ യുവതിക്ക് ദാരുണാന്ത്യം

മാള: അഷ്ടമിച്ചിറയിൽ നടന്ന ദാരുണമായ ബൈക്ക് അപകടത്തിൽ യുവതി മരിച്ചു.പുത്തൻചിറ സ്വദേശി പുല്ലൂപറമ്പിൽ ജേക്കബിന്റെ ഭാര്യ ലിജ (വയസ്സ് ലഭ്യമല്ല)യാണ് മരിച്ചത്.ഇന്നലെ വൈകിട്ട് ഏകദേശം 7 മണിയോടുകൂടിയാണ് അപകടം സംഭവിച്ചത്. ഭർത്താവിനൊപ്പം അഷ്ടമിച്ചിറയിൽ നിന്നും പുത്തൻചിറയിലേക്ക് സ്വന്തം ബൈക്കിൽ മടങ്ങുന്നതിനിടെയായിരുന്നു സംഭവം.എതിർദിശയിൽ നിന്നെത്തിയ ബൈക്ക് ഒരു കാറിനെ ഓവർടേക്ക് ചെയ്യുന്നതിനിടെ ജേക്കബിന്റെ ബൈക്കിൽ ഇടിച്ചുവെന്ന് പൊലീസ് അറിയിച്ചു. ഇതോടെ ബൈക്കിന്റെ പിൻസീറ്റിൽ ഉണ്ടായിരുന്ന ലിജ റോഡിലേക്ക് തെറിച്ചുവീണു. പിന്നാലെ എതിർവശത്ത് വന്ന മറ്റൊരു കാറിൽ ഇടിച്ച് ഗുരുതരമായി പരിക്കേൽക്കുകയായിരുന്നു.തലയ്ക്ക് ഗുരുതരമായി പരിക്കേറ്റ ലിജയെ ഉടൻ അപ്പോളോ ആശുപത്രിയിൽ പ്രവേശിപ്പിച്ചു. അടിയന്തര ശസ്ത്രക്രിയ നടത്തിയെങ്കിലും ജീവൻ രക്ഷിക്കാനായില്ല.ഇന്ന് രാവിലെ 10.15ഓടെയാണ് ലിജ മരണത്തിന് കീഴടങ്ങിയത്.അപകടത്തിന് കാരണമായ ബൈക്ക് നിർത്താതെ പോയതായി പൊലീസ് അറിയിച്ചു.ഭർത്താവ് ജേക്കബിന് വലിയ പരിക്കുകളൊന്നുമില്ല.മാള പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.