നിയമലംഘനങ്ങൾ കണ്ടെത്താനായി ജനറൽ ഡയറക്ടറേറ്റ് ഓഫ് ട്രാഫിക് സ്മാർട്ട് ക്യാമറ സംവിധാനം

മൊബൈൽ ഫോൺ ഉപയോഗം, സീറ്റ് ബെൽറ്റ് ധരിക്കാതിരിക്കൽ തുടങ്ങിയ നിയമലംഘനങ്ങൾ കണ്ടെത്താനായി ജനറൽ ഡയറക്ടറേറ്റ് ഓഫ് ട്രാഫിക് സ്മാർട്ട് ക്യാമറ സംവിധാനം ഔദ്യോഗികമായി സജീവമാക്കി.പുതിയ സംവിധാനം വഴി നിയമലംഘനങ്ങൾ രേഖപ്പെടുത്തി തുടങ്ങിയതായി ആഭ്യന്തര മന്ത്രാലയം അറിയിച്ചു. ആധുനിക സാങ്കേതികവിദ്യയുടെ സഹായത്തോടെ ഗതാഗത നിയമങ്ങൾ കർശനമായി നടപ്പിലാക്കാനും തെറ്റായ ഡ്രൈവിംഗ് രീതികൾ ഒഴിവാക്കി റോഡ് സുരക്ഷ വർദ്ധിപ്പിക്കാനുമാണ് ഈ നീക്കത്തിലൂടെ ലക്ഷ്യമിടുന്നത്.വാഹന രജിസ്‌ട്രേഷൻ, ഡ്രൈവിംഗ് ലൈസൻസ് പുതുക്കൽ, രേഖപ്പെടുത്തിയ ട്രാഫിക് പിഴകൾ എന്നിവയെക്കുറിച്ചുള്ള അറിയിപ്പുകൾ കൃത്യസമയത്ത് ലഭിക്കുന്നതിനായി ‘മൈ ഗവ്’ ആപ്പിലെ വ്യക്തിഗത വിവരങ്ങൾ പുതുക്കണമെന്ന് അധികൃതർ നിർദ്ദേശിച്ചു.കൃത്യമായ വിവരങ്ങൾ നൽകുന്നതിലൂടെ ട്രാഫിക് അറിയിപ്പുകൾ വേഗത്തിൽ ഉപഭോക്താക്കളിലേക്ക് എത്തും. നിയമങ്ങൾ പാലിക്കേണ്ടത് ഓരോ ഡ്രൈവറുടെയും ഉത്തരവാദിത്തമാണെന്നും ഗതാഗത അവബോധം ജീവിതശൈലിയുടെ ഭാഗമാക്കണമെന്നും ഡയറക്ടറേറ്റ് ഓർമ്മിപ്പിച്ചു.