തിരഞ്ഞെടുപ്പ് ഗീതം, ചിത്രയുടെ ശബ്ദത്തിൽ ഇന്ന് പുറത്തിറങ്ങും..

0
79
കെ. എസ്. ചിത്രയുടെ മധുരശബ്ദത്തിൽ തെരഞ്ഞെടുപ്പ് ഗാനം ഇനി കേരളക്കരയാകെ അലയടിക്കും. വോട്ടർ ബോധവത്കരണ പരിപാടിയായ സ്വീപിന്റെ ഭാഗമായാണ് പാട്ട് തയ്യാറാക്കിയത്. ആദ്യമായാണ് ഇലക്ഷൻ വിഭാഗം മലയാളത്തിൽ ഒരു ഔദ്യോഗിക തെരഞ്ഞെടുപ്പ് ഗീതം ഒരുക്കുന്നത്. ഗാനത്തിന്റെ ഡി.വി.ഡി പ്രകാശനം ഏപ്രിൽ മൂന്നിന് രാവിലെ 10ന് വി. ജെ. ടി ഹാളിൽ നടക്കുന്ന ചടങ്ങിൽ ഗവർണർ പി. സദാശിവം നിർവഹിക്കും. ജ്യോതിർഗമയ ഫൗണ്ടേഷൻ സ്ഥാപക ടിഫാനി ബ്രാർ ഡി.വി.ഡി ഏറ്റുവാങ്ങും.
മുഖ്യതിരഞ്ഞടുപ്പ് ഓഫീസർ ടിക്കാറാം മീണയുടേതാണ് തെരഞ്ഞെടുപ്പ് ഗീതം എന്ന ആശയം. ഐ. എം. ജി ഡയറക്ടറും മുൻചീഫ് സെക്രട്ടറിയും ഗാനരചയിതാവുമായ കെ. ജയകുമാർ മനോഹരമായ വരികളിലൂടെ ഇതിന് സാക്ഷാത്കാരം നൽകി. മാത്യു ടി. ഇട്ടിയാണ് സംഗീതം പകർന്നത്.
”കഴിഞ്ഞ നിയമസഭാ തെരഞ്ഞെടുപ്പ് വേളയിൽ സി വിജിൽ ആപ്പിന്റെ പ്രവർത്തനങ്ങൾ ഏകോപിപ്പിക്കുന്നതിന് തിരഞ്ഞെടുപ്പ് കമ്മീഷൻ രാജസ്ഥാനിൽ എന്നെ നിയോഗിച്ചിരുന്നു. അവിടെ പല ജില്ലകളും സന്ദർശിച്ചപ്പോൾ പ്രാദേശിക ഭാഷയിലുള്ള തെരഞ്ഞെടുപ്പ് ഗാനങ്ങൾ ശ്രദ്ധയിൽപെട്ടു. ഇത്തവണ കേരളത്തിലെ തെരഞ്ഞെടുപ്പ് ചുമതല ലഭിച്ച സമയത്താണ് മലയാളത്തിലുള്ള തെരഞ്ഞെടുപ്പ് ഗാനം എന്ന ആശയം മനസിലുണ്ടായത്. അങ്ങനെയാണ് കെ. ജയകുമാർ സാറുമായി ഈ വിഷയം സംസാരിക്കുന്നത്. അദ്ദേഹം വരികൾ എഴുതാമെന്ന് ഉറപ്പ് നൽകിയപ്പോൾ മറ്റു നടപടികളുമായി മുന്നോട്ടു പോവുകയായിരുന്നു,” മുഖ്യതിരഞ്ഞെടുപ്പ് ഓഫീസർ ടിക്കാറാം മീണ പറഞ്ഞു.
”ഭാരത ഭാഗ്യവിധാതാക്കൾ നാം….” എന്നാരംഭിക്കുന്ന ഗാനം രണ്ടു മാസത്തെ യത്‌നത്തിലാണ് യാഥാർത്ഥ്യമായത്. വോട്ടു ചെയ്യാൻ തയ്യാറെടുക്കൂ, വോട്ടർ എന്നതിൽ അഭിമാനിക്കൂ തുടങ്ങിയ സന്ദേശങ്ങളാണ് നാലു മിനിട്ടുള്ള ഗാനം മുന്നോട്ടു വയ്ക്കുന്നത്. സാംസ്‌കാരിക, സാമൂഹ്യ, ദേശഭക്തി ആശയങ്ങൾ ഉൾപ്പെടുത്തിയാണ് ഗാനം ഒരുക്കിയതെന്ന് ടിക്കാറാം മീണ പറഞ്ഞു.
കെ. എസ്. ചിത്രയോട് തെരഞ്ഞെടുപ്പ് ഗീതം പാടുമോയെന്ന് ചോദിച്ചപ്പോൾ ഉടൻ തന്നെ സമ്മതം അറിയിക്കുകയായിരുന്നുവെന്ന് മുഖ്യ തിരഞ്ഞെടുപ്പ് ഓഫീസർ പറഞ്ഞു. ശാസ്തമംഗലത്തെ സ്റ്റുഡിയോയിൽ വച്ചാണ് ഗാനം റെക്കോഡ് ചെയ്തത്. ഇൻവിസ് മൾട്ടിമീഡിയയാണ് ഗാനത്തിനാവശ്യമായ വീഡിയോ ചിത്രീകരിച്ചത്.
കേരളത്തിന്റെ തെരഞ്ഞെടുപ്പ് ഐക്കണുകളായി നിശ്ചയിച്ചിട്ടുള്ള കെ. എസ്. ചിത്രയെയും ഇ. ശ്രീധരനെയും ചടങ്ങിൽ പൊന്നാട അണിയിച്ച് ആദരിക്കും. ഇവരുടെ ചിത്രങ്ങൾ ഉൾപ്പെടുത്തി തെരഞ്ഞെടുപ്പ് ബോധവത്കരണ പോസ്റ്ററുകൾ തയ്യാറാക്കിയിട്ടുണ്ട്. സ്വീപിന്റെ ഭാഗമായുള്ള വിവിധ പോസ്റ്ററുകളും ഗവർണർ പ്രകാശനം ചെയ്യും. പൊതുജനങ്ങൾ ചടങ്ങിൽ പങ്കെടുക്കണമെന്ന് മുഖ്യ തിരഞ്ഞെടുപ്പ് ഓഫീസർ അഭ്യർത്ഥിച്ചു.

അവലംബം: PRD ന്യൂസ്.

SHARE

LEAVE A REPLY

Please enter your comment!
Please enter your name here